Шинэ үе, царайлаг жүдоч Д.Төмөрхүлэгийн тухай сонирхолтой баримтууд

1.  Түүний аав Ч.Даваадорж уран барилдаант улсын харцага. Хүүдээ олон мэх зааж өгснөөс хамгийн сайн сурсан нь хутгах мэх аж. Энэ мэхээр өдий хэмжээний амжилттай яваа гэж залуу жүдоч ярьсан байдаг.

 

2.   Өвөрхангай аймгийн Нарийнтээл сумын харьяат Монгол Улсын улам нэмэх харцага, самбо бөхийн ОУХМ, цагдаагийн дэд хурандаа Чогжинмөнсөлийн Даваадорж агсны нэрэмжит "Сумын заануудын багийн барилдаан" залуу бөхчүүдэд нэг сорилт болдог.

 

3.   Д.Төмөрхүлэг сумын заан цолтой. Завтай байвал аймаг, сумын заан цолтнуудын барилдаанд тогтмол барилддаг. Ирээдүйд аавынхаа авсан харцага цолонд хүрэхийг мөрөөддөг.

 

4.    Бүсгүйчүүдийн анхаарлын төвд орсон Д.Төмөрхүлэг ганц бие.

 

5.   Тэр 1990 онд төрсөн. 172 см өндөр, 65 кг жинтэй. Лондонгийн Олимпоос хойш 66 кг-д амжилттай барилдаж байгаа.

 

6.    Энэ жинд Х.Цагаанбаатар, С.Мияарагчаа нар барилдаж байсан. Ах нартайгаа өгөө аваатай байсан залуу жүдоч амжилтын буухиаг нь хадгалан үргэлжлүүлнэ гэж ам гарсан.

 

7.    Тэр Лондонгийн олимпоос хойш гурван алт, гурван мөнгөн медаль хүртсэн. Харин урд шөнө Рио-2016-ийн дэвжээнээс шагналт 7 дугаар байрын амжилттай буулаа.

 

8.    Д.Төмөрхүлэг Францад цөөнгүй фэнтэй. Монгол-Франц тамирчид хамтарсан бэлтгэл хийдэг болсноос хойш Д.Төмөрхүлэгтэй таарахдаа францчууд гарын үсэг авч, хамт зургаа авахуулдаг болсон байна.

 

9.     Д.Төмөрхүлэг ээж дүүгийн хамт амьдардаг. Олимпид хүүгээ дэмжихээр ээж нь очсон байна.

 

10.   Залуу жүдочийг Х.Цагаанбаатарын занг хуулж байна гэдэг. Тэр энэ талаар "Цагаанаа ахтай ойр дотно байдаг нь үнэн. Тэр хүний барилдааны арга техник, туршлагаас нь суралцдаг. Цагаанаа ахыг овилгогүй зантай гэж хэзээ ч бодож байгаагүй. Тамирчин хүн байна даа түрэмгий зан, хор шар байлгүй яах вэ. Хүмүүс үүнийг л буруугаар ойлгоод байгаа бололтой. Би хэзээ ч онгирч сагсуурч яваагүй. Энгийн л нэг Төмөрхүлэг шүү дээ" гэжээ.