Непал: Амь үрэгдсэн хүний тоо 472-т хүрч, 1000 гаруй хүн сураггүй байна

Пүрэв гараг/2026.08.27/

 Непал болон Хятадыг холбосон хилийн уулархаг бүсэд болсон гэнэтийн үерийн улмаас сураггүй болсон иргэдийг аврах, эрэн хайх ажиллагаа үргэлжилж байна. Аврагчид хог хаягдлаар дүүрсэн хөндий, намаг, уулын энгэр газруудаар гурав дахь өдрөө нойр хоолгүй ажилласаар...

Непал болон хөрш Хятад Улсаас нийт 472 хүн амь үрэгдэж, 1000 гаруй хүн сураггүй алга болсон тухай мэдээлэв.

Лхагва гарагт болсон уг гамшгийн улмаас Катмандуг Лхастай холбосон уулын замууд хаагдаж, олон хот тосгод тусгаарлагдсан тул эрх баригчид нисдэг тэрэг дайчлан эсэн мэнд үлдсэн хүмүүст яаралтай тусламжийн бараа, материал хүргэж байна. Өндөр уулсын асар хүчтэй үер нь аялагчид болон мөргөлчдийн олноор зорчдог замыг дайран өнгөрсөн  учраас гадаадын олон иргэн амь эрсдэж, сураггүй болсон юм.

Ахиад гамшиг !!!

Непалын гамшгийн удирдлагын газраас хиймэл дагуулын зураг болон урьдчилсан шинжилгээнд үндэслэн Бхотекоши голын дагуу дахин үер буух магадлалтайг анхаарууллаа. Лхагва гарагт болсон гамшгийн улмаас гол зарим хэсэгтээ боогдож, шинээр нуур үүссэн байна. Уг нуурын усны түвшин нэмэгдэж, хальж болзошгүй тул голын доод эргийн дагуу амьдарч буй оршин суугчид болон аврагчдыг аюулгүй бүс рүү нүүхийг албаныхан хүсжээ.

Непалын Дотоод хэргийн сайд Судхан Гурунг нэн тэргүүний зорилго бол амьд үлдсэн хүмүүсийг олох хэмээн мэдэгдэв. Түүний мэдээлснээр, гамшигт өртсөн Тришули орчмын бүс нутгаас сураггүй болоод байсан Энэтхэгийн 100 жуулчин (ихэнх нь мөргөлчид) болон Хятадын 25 ажиглагчийг эсэн мэнд олсон байна. Гэвч гадаадын 550 орчим иргэн сураггүй байгаа бөгөөд орон нутгийн иргэдээс хичнээн хүн алга болсныг нарийвчлан тогтоож амжаагүй аж.

Тосгод газрын хөрснөөс арчигдав

 Улаан загалмайн нийгэмлэгийн мэдээлснээр олон тосгон усанд автаж, зам гүүр ашиглах боломжгүй болсгы улмаас олон нийгэмлэг  ч гадаад ертөнцтэй харилцаа холбоо тасраад байгаа юм.

Гамшгаас эсэн мэнд үлдэж, Непалын эмнэлэгт эмчлүүлж буй 68 настай Кешав Прасад: "Бидэн рүү шаврын асар том үер дайраад ирсэн. Ойртох тусам өндөр болсоор байлаа. Эхнэрийнхээ гараас бариад дээвэр рүү гарах гэж хичээсэн боловч түүнийг  минь агшан зуур шаврын асар том эргүүлэг шүүрчихлээ" хэмээн ярьж байна. Нисдэг тэрэгтэй аврагчид  түүнийг гамшгаас дөрвөн цагийн дараа аварсан ч эхнэр нь ор сураггүй болжээ.

Хятадын төв телевизийн мэдээлснээр Төвөдийн Гйиронг (Gyirong) Шяньд 260 гаруй гадаад иргэн нийт 558 хүн сураггүй болсон бөгөөд баттай мэдээллээр Хятад Улсын 3 иргэн амь үрэгджээ. Сураггүй болсон гадаадын иргэдийн дотор Энэтхэг (288), АНУ (63), Малайз (51), Австрали (34), Их Британи (33), Канад (25) зэрэг хорь гаруй орны иргэн багтжээ.

Урсгал даган хөвөх цогцсууд:

Гамшгийн хохирол зөвхөн уулархаг нутгаар хязгаарлагдсангүй, үерийн ус цогцсуудыг Непалын тал газарт хүргэжээ. Гамшигт хамгийн ихээр нэрвэгдсэн нутгаас 100 орчим км зайд орших Читвон дүүргийн удирдлагууд голын ай саваас 103 хүний цогцос олсноо мэдэгдэв. Орон нутгийн эмнэлгүүд бүх цогцсыг хүлээн авах боломжгүй тул эрх баригчид асрууд байгуулж, ар гэрийнхэн нь ирж танихад зориулсан зохицуулалт хийж байна.

Хятадын Ерөнхий сайд Ли Цян Пүрэв гарагт  Гйиронг дахь гамшигт нэрвэгдсэн бүсэд очиж ажилласан тухай Синьхуа агентлаг мэдээлэв.

Непалын Ерөнхий сайд Бален Шах гамшигт өртсөн дүүргүүдийн нэг болох Нувакотод өөрийн биеэр очиж нөхцөл байдалтай танилцсан байна. Энэхүү гамшиг нь таван сарын өмнө Непалийн  засгийн эрхэнд гарсан Ерөнхий сайд Бален Шахын хувьд томоохон сорилт болж байна.

 Шинэ мэдээ: 

  Шинээр үүссэн нуурын усны түвшин нэмэгдэж, эрэг далангаа сэтлэх вий гэсэн айдас нэмэгдсэнтэй холбогдуулан Хятадын эрх баригчид Непал-Төвөдийн хил орчмын үерийн аврах ажиллагааг түр зогсоолоо.

 Гэнэтийн үер Гималайн хил орчмын бүсийг сүйрүүлснээс хойш 48 гаруй цагийн дараа амь эрсдэгсдийн тоо 475-д хүрээд байгааг Непалын Цагдаагийн газраас мэдээлэв.

Төвөдөд 3 хүн амь үрэгдэж, 550 гаруй хүн сураггүй байна. Эдгээр сүүлчийн тоо баримтууд дахин давхацсан эсэх нь одоогоор тодорхойгүй байна.

Гамшгийн бүсэд хоёр дахь үер бууж магадгүй гэх мэдээллээс үүдэн эсэн мэнд үлдсэн хүмүүсийг хайж буй аврагчид "маш хүнд, сэтгэл зүйн дарамттай" нөхцөлд байна гэж Улаан загалмайн албаны хүн BBC агентлагт ярьжээ.

Жил бүр арван мянга гаруй жуулчин тус бүс нутгийг зорьдог бөгөөд BBC сураггүй болсон хүмүүсийн ар гэрийнхэнтэй холбогдон ярилцжээ. Эцэг эх нь сураггүй болоод байгаа хоёр эгч дүү "Бид тэдэндээ маш их хайртай, гэртээ эсэн мэнд эргэн ирээсэй гэж хүсэж байна" хэмээн ярьсан байна