Б.Жавхлан: Засгийн газрын бондын үнэлгээ унаж байна

0

 Түүхий эдийн үнэ унасан, инфляц импортлох дарамт,  АНУ, Хятадын худалдааны сөргөлдөөн гээд эдийн засагт нэлээн эрсдэл үүсээд байгааг Сангийн сайд хэлэв. Төлөвлөлтөө улирлаар биш долоо хоногоор харж хийх шаардлага үүсч байгаа гэв.

Сангийн сайд Б.Жавхлан:

Гуравдугаар сард өмнөх саруудаас экспортын хэмжээ нэмэгдсэн. Нэгдүгээр сард 200 орчим сая, хоёрдугаар сард 248 сая, гуравдугаар сард 253 сая ам.долларын экспорт хийсэн дүн мэдээ гарлаа. Төвбанкны мэдээллээр валютын нөөц 5 тэрбум ам.доллар байна. Ирэх долоо хоногоос экспортын биет хэмжээг нэмэгдүүлэхийн тулд боомтууд чиглэсэн үйл ажиллагаа явуулахаар шийдвэрлэлээ.

Шинэ зохицуулалт руу орсон ч уул уурхайн бирж дээр арилжаа төдийлэн сайжрахгүй байна. Нүүрсний үнэ унаснаас болоод биржийн арилжаанд өмнө нь орсон худалдан авагч нар нэлээн хохирол амсаад байгаа юм. Тиймээс бирж дээр үүссэн түгжрэлийг бууруулахад анхаарч ажиллаж байна. Мөн төмөр замын тарифын өртгийг бууруулах, автозамын тээврээс ч бага байлгах даалгавар ЗТХЯ-нд өгсөн. Өмнө нь зогсоосон автотээврийн хөдөлгөөний стандартад нийцүүлэн нээх үүрэг холбогдох сайд нар болон орон нутгийн удирдлагад өгсөн.

Уул уурхайн яамнаас гаргасан судалгаагаар багадаа 30 сая ам.долларын бүтээгдэхүүн түгжигдсэн үйлдвэрүүд дээр үүссэн нөхцөл байдлыг арилгахаар ажлын хэсэг ажиллаж байна.

-АНУ БНХАУ руу худалдааны өндөр тариф ногдуулж байгаа нь дэлхийн олон улсын эдийн засагт хүндрэл, сорилт болж байна. АНУ нь 180 улсад суурь тариф 10 хувь мөн АНУ-д гадаад худалдааны хувьд алдагдалтай гэж үздэг орнуудад нэмэлт 50 хувийн тариф тогтоолоо. Хариуд нь Хятад 34, Канад 25, ЕХ 50 хувь гэх мэтээр сөрөг тариф тогтоосон. Гадаад худалдааны ийм сөргөлдөөнд ялагч тал гэж байдаггүй. Үүнээс болоод олон орны эдийн засгийн өсөлт унаж, инфляц нь өсч байна. Шинэ тарифыг зарламагц дэлхийн томоохон хөрөнгийн зах зээл дээр нийтээрээ бондын үнэлгээ нь 6-7 их наяд ам.доллараар уналаа.

Үүнээс болж хөгжиж буй орнуудын Засгийн газрын бондуудын үнэлгээ унаж байна. Манай бондын үнэлгээ ч унаж эхэлсэн. Гол түүхий эдийн үнэлгээнд асар ихээр нөлөөлж байна. Нүүрсний болон зэсийн үнэ, нефтийн үнэ уналаа. Суурь инфляцад нөлөөлдөг нефтийн үнэ асар их унасан. Энэ бүхэн манай эдийн засагт ч нөлөөлөх нь тодорхой. Худалдааны эдийн засагтай манай орон инфляц импортлох дарамт ч байна. Тиймээс бид улирлаар, сараар биш 7 хоногоор нь төлөвлөж ажиллах шаардлагатай болсон.

-Төрийн өмчийн мэдлийн үйлдвэрлэгчид нийтдээ 580 сая ам.долларын бүтээн байгуулалтаа эрэмбэлж хойшлуулахаар шийдвэрлээд байгаа.

-Төсвийн хувьд одоогоор ямар нэг эрсдэл гараагүй байна.