Д. АМАРБАЯСГАЛАН ИХ ХУРЛЫН ДАРГЫН СУУДЛАА НАМЫН ДАРГЫН СУУДЛААР СОЛИХОО ИЛ ТОД МЭДЭГДЛЭЭ

Д. АМАРБАЯСГАЛАН ИХ ХУРЛЫН ДАРГЫН СУУДЛАА НАМЫН ДАРГЫН СУУДЛААР СОЛИХОО ИЛ ТОД МЭДЭГДЛЭЭ

 

            Дашзэвгийн Амарбаясгалан улсын их хурлын даргын суудлаасаа уйдаад ардын намын даргын суудалд заларч цаашлаад ерөнхий сайдаар ажиллах амбицтай гэдгээ өнөөдөр хэвлэлийнхнйи өмнө ил цагаан мэдэгдэж намрын улстөрийн хамгийн том мэдэгдлийг хийчихлээ. Ардын намын генсекээр ажиллаж байхдаа ерөнхийлөгчийн сонгуульд өрсөлдөөд тахим буулгасан М. Энхболдыг эхлээд хамгаалж байгаад эцэст нь 60н тэрбумын хэрэгт холбоотой байсан нь үнэн юм билээ гээд Л. Оюун-Эрдэнэд галын дэмжлэг үзүүлж хоршиж, бас ах нараасаа урваж болдгийг харуулж байсан. Монголын улстөрийн ууган хүчин ардын намын хаалгыг 80-н оны залуус зад татаад орж ирсэн гэж тоймчид тухайн үед шуугиж байлаа. Үнэндээ бол 60н оныхноос улстөрийн болон засаглалын эрх мэдлийг дал болон наян оныхон хүчээр булааж авч эрх мэдлийн олсноос зүүгдсэн цаг үе. Гэхдээ энд нэг зүйлийг онцлоход АХ нараасаа урваж болдгийг, бас тэднийг айлгаж албан тушаал эрх мэдэлд хүрч болно гэсэн хүч бас зүрх 80-н оныхонд орсон гээд дүгнэчихэж болно.

            Хэдхэн жилийн өмнө болсон энэ түүх дахин давтагдахаар устөрийн хүрээнд ширүүхэн зодоон тун удахгүй эхлэх нь ээ. Энэ удаа  ардын намын 60 болон 70 оныхон, албан тушаал зохихгүй гэдэгээ үг үйлдлээрээ бататгасан 80н оныхноос намаа салгаж авахаар нэгэнт санаа зорилгоо нэгтгэжээ.

            Харин нөгөө талд албан тушаал эрх мэдлийн амтыг нь мэдэрчихсэн, бас энэ удаагийн намын даргын сунгааг алдах юм бол бүтэн үеээрээ хойш суухаас өөр аргагүй нөхцөл байдал угтаж мэдэх 80н оныхон нэг талдаа гарчихаад ах нарынхаа өөдөөс сөрөн зогсож байна.

            Намын даргын суудлаа алдвал бүх юмаа алдана гэж бодсон 80н оныхон хэсэг бүлгээрээ хэд гурваараа уулзсан гэдэг албан болон албан бус мэдээлэл яваад байгаа. Ардын намыг ялуулсан намын дарга нь засгаа толгойлох эрхтэй гэдэг дүрмийн заалтаа бариад л тэд урагшлах нь ээ. Гэхдээ өнөөх намын дарга нь эрх мэдэл албан тушаалаа хэтрүүлэн ашилаад улсын төсвийн 9,3 их наяд төгрөгийг үгүй хийчихсэн, ард түмэн түүнийг дэмжихгүй гэдгийг тэд тооцоогүй бололтой. Тооцсон ч байж мэднэ. Ерөнхийлөгчийн хүн гэгддэг Г. Занданшатарын эсрэг намын даргын сунгаанд сойх хамгийн боломжтой хүнээр Д. Амарбаясгалан гээд түүнийг өмнөө бамбай болгоод ардаас нь 80н оныхон жагслаа.

            Гэхдээ аливаа асуудлыг ерөнхийлөгч болон ерөнхий сайдын зүгээс явж байгаа мэтээр нийгэмд хар бараан мэдээлэл цацагч нь хажууд нь байгаа экс ерөнхий сайд Л. Оюун-Эрдэнэ  болон түүний ах Херо Баатар, Женко Баттулга нар гэдгийг Д. Амарбаясгалан гадарлаа ч үгүй яваа байж мэдэх. Л. Оюун-Эрдэнийн хувьд одоо алдах юм гэвэл улсын их хурлын гишүүний суудал. Харин Д. Амарбаясгалын хувьд Үндэсний аюулгүй байдлын зөвлөлийн гишүүн, Их хурлын дарга гэсэн маш өндөр сэнтийгээ намын даргын сунгаанд дэнчин тавьж  ALL IN  хийлээ. Тэртээ 2016 оноос хойш хөл толгойгоо олохгүй явсаар 2024 оны сонгуулийн дараа л учраа олж ЖАН нам бидэнд хэрэггүй юм байна гэдгийг ойлгож яваа Ардчилсан намын 2016 оны түүхийг ардын намынхан давтахаар бүлэг фракцуудад хуваагдаад хэн нь хэнийгээ улстөрийн тавцнаас арчих вэ гэдэг зодооноо намрын чуулганы өмнө эхлүүллээ. Үйл явдал хэрхэн өрнөж улстөрийн тулаанд хэн ялах нь удахгүй тодорхой болно. Гэхдээ нэг зүйлийг хэлэхэд төрийн болон тусгаар тогтнолын ордны зодоон нь гудамжинд гараад түмний зодоон болох вий гэдгээс эмээж байна. Маргалдагч талууд үүнийг тунгаана биз ээ