Монгол Улсын Засгийн газрыг төлөөлж Сангийн сайд “Рио Тинто”-той хэлэлцээр хийнэ

Монгол Улсын Засгийн газартай хэлэлцээр хийхээр өнгөрсөн гуравдугаар сард “Рио Тинто” компанийн Зэсийн группийн захирал Кэйти Жаксон тэргүүтэй удирдлагын баг ирж, Ерөнхий сайд асан Г.Занданшатартай уулзсан. Энэхүү уулзалт дэлхийн хэвлэлүүдийн анхаарлыг ч зүй ёсоор татсан байдаг.

Монгол Улсын зүгээс “Оюутолгойн өгөөжийн 60 хувийг Монголын ард түмэн хүртэх ёстой”, хөрөнгө оруулалтын гэрээнд өөрчлөлт хийнэ. Цаашид “WIN WIN” буюу бизнесийн алтан дүрэм болсон харилцан ашигтай байх зарчим дээр хэлэлцээрийн ширээний ард тохиролцож чадахгүй бол хатуу арга хэмжээ авна гэсэн байр суурь илэрхийлсэн. Тухайн үед Сангийн сайдаар ажиллаж байсан Б.Жавхлангаар ахлуулж “Оюутолгой төслийн зээлийн хүү 11 хувь байгааг хоёр дахин бууруулах, менежментийн төлбөрийг зардлаас биш орлого, үр дүнгээс авах зарчимын өөрчлөлт оруулах зэрэг асуудлаар хэлэлцээр хийх” ажлын хэсэг байгуулсан. Гэвч өнгөрсөн хугацаанд  хоёр ч удаа хэлэлцээрийн ширээнд суусан ч зээлийн хүү бууруулах тал дээр хатуу байр суурьтай байна гэдгийг Ажлын хэсгийн ахлагч Сангийн сайд З.Мэндсайхан илэрхийлсэн.

Үндэсний аюулгүй байдлын зөвлөл өчигдөр энэ асуудлаар хуралдсан ч Сангийн сайд З.Мэндсайхан “Рио Тинто” группийн Зэсийн группийн захирал Кэйти Жаксон болон “Оюутолгой” компанийн ТУЗ-ийн дарга Шон Хинтон нарын өнөөдрийн уулзалтаас шийдэл хүлээж байна.

Өмнөх хоёр хэлэлцээрээс бодит үр дүн гараагүй ч хоёр талаас нөхцөл байдлаа тайлбарлаж чадсан гэж Сангийн сайд хэлж байгаа ч өнөөдрийн хэлэлцээр тодорхой үр дүнд хүрэхгүй бол Үндэсний аюулгүй байдлын зөвлөл зөвлөмж чиглэл өгөөд зогсохгүй, иргэдийн зүгээс Сүхбаатарын талбайд тэмцэл хөдөлгөөн өрнүүлэхээ мэдэгдээд байна.

Ажлын хэсгийг ахалж байсан Сангийн сайд асан Б.Жавхлан "Оюутолгой төслийг зогсоогоод ч болов гэрээг өнөөдөр л засч сайжруулахгүй бол оройтно. Зөвхөн менежментийн төлбөрийг хоёр дахин бууруулахад 2.2 тэрбум ам.доллар хэмнэнэ" гэж өөрийн байр суурийг илэрхийлжээ.