Эрчим хүчний салбарынхан ажил хаях уу

Эрчим хүчний салбарын ажилчид цалингаа 30 хувь нэмүүлэх шаардлага тавьж, зургадугаар сарын 30 буюу өнөөдрөөс ажил хаяхаа мэдэгдсэн. Ажил хаялтад 22 байгууллагын 6000 гаруй ажилтан нэгдэхээ илэрхийлсэн гэж Үйлдвэрчний эвлэлээс нь мэдээлсэн. Тэгвэл өнөөдрийн байдлаар Засгийн газартай хэлэлцээр хийх боломж бүрдсэн учраас долдугаар сарын 2-ныг хүртэл хойшлуулсан гэв. 

Үйлдвэрчний эвлэл нь эрчим хүчний ажилчдын дундаж цалин 1.8-2.5 сая орчим байна гэж мэдээлэл өгсөн бол Эрчим хүчний сайд Б.Найдалаа дундаж цалин 3.7 сая гэдэг  тоо хэлээд буй юм.

Эрчим хүчний сайд Б.Найдалаа “ Эрчим хүчний  салбарын санхүүгийн  тогтолцоонд 30 хувиар цалин нэмэх боломж байхгүй. Ажил хаялаа гэхэд үйлдвэрлэл зогсохгүй зохицуулалттай байдаг. Эрчим хүчний салбарт хүний нөөцийн бодлогын баримт бичиг боловсруулсан, батлахад бэлэн болсон. Эрчим хүчний салбарын хоёр Үйлдвэрчний эвлэлийн холбооноос цалингаа 30 хүртэл хувь нэмэхийг шаардаж, ажил хаях тухай ярьж байна. Энэ бол Эрчим хүчний салбарт урд нь гарч байгаагүй тохиолдол.

Эрчим хүчний салбар бол төрийн алба биш. Төрийн өмчит болон хувийн хэвшлийн 27 компани ажиллдаг. Тэдгээрийн цалинг салбарын сайд төрийн албан хаагч тогтоодоггүй. Тухайн компани үр ашигтай ажилласан эсэхээс хамаарч ажилчдын цалин урамшуулал тогтдог. Өөрөөр хэлбэл, хариуцлага нь сайдын биш захирлын гарт байдаг. Цаашид үр ашгийг дээшлүүлэх чиглэлээр хийж байгаа ажлууд бий.  Хэдийгээр бид албан ёсоор цалинг тогтоохгүй ч боломжоо ашиглаад 10 хувиар нэмэгдүүлэхээр шийдсэн. Гэхдээ захирлууд, захиргааны ажилтнууд, арын албаны ажилчдын цалинг нэмэхгүй. Үйлдвэрлэл дээр байгаа инженер, техникийн ажилтнуудынхыг нэмэх талын бодлого баримтална. Манай салбарын дундаж цалин өнөөдрийн байдлаар 3.745 мянган төгрөг байна. Монгол Улсын дундаж цалин 2.9 сая байна. Тэгэхээр дундаж цалинтай харьцуулахад уул уурхайн салбарын ард явж байна. Цалингийн системийг шинэчилж, шударга болгохгүй бол асуудал бүрэн шийдэгдэхгүй. Удирдлагын зардлыг танах, чиг үүргийн давхардлыг арилгах чиглэлээр ажиллаж байгаа. Тиймээс ачаалал үүрч, үйлдвэрлэл дээр ажиллаж байгаа, цалин бага хэсэгт л 10 хувиар нэмнэ” гэж хэлсэн.