С.Баасандэлгэр: Миний зорилго аль болох олон залуучуудыг ажлын байртай болгох

Сийлбэрийн урлагийг Монгол уран зурагтай хослуулан дахин давтагдашгүй хийц, загвартай Монгол гэр, модон тавилга бүтээдэг “Урчуудын хясаа” компанийн үүсгэн байгуулагч, уран сийлбэрч Сүхбаатарын Баасандэлгэр “Бидний нэг” контентийн энэ удаагийн дугаарт оролцлоо. Хоймор нутгийн уран дархчуудын удам С.Баасандэлгэр үндэсний үйлдвэрлэгч, баялаг бүтээгч залуучуудын төлөөлөл юм.

-Сайн байна уу. Та Тойм.мн сайтын уншигчдад өөрийгөө танилцуулахгүй юу?

-Сайн байна уу? Намайг Сүхбаатарын Баасандэлгэр гэдэг. Сийлбэрийн урлагийг дөрөвдүгээр ангиасаа сурч эхэлсэн. Миний хувьд “Урчуудын хясаа” компанийг 2012 онд анх үүсгэн байгуулж байлаа. Одоо Монгол зургийг уран сийлбэртэй хослуулан Монгол гэр, модон тавилга хийж байна. Манай өвөөгийн аавын талынхан гангийн дархчууд байсан. Гангийн дархан гэдгийг хэр баргын хүн хийгээд байдаггүй. Өвөөгийн аав Ядам гэдэг хөгшнөөс алт, мөнгөний дархан болж тэрнээс хойш мод руу орцгоосон. Манай нагац ах нар модоор юм хийдэг. Хажууд сийлбэр хийдэг хүмүүс байсан болохоор би дуурайж хийсээр байгаад сурсан. Хамгийн анхны захиалга сийлбэртэй Монгол гэр байсан. Монгол гэрээ жижгээс нь том хүртэл тэгээд тавилга, сандал, ширээ, авдар, ор бас байрны тохижилтуудыг хийдэг.

-Монгол зургийг сийлбэртэй хослуулан бүтээсэн Монгол гэр, модон тавилгын онцлог, үнэ цэнэ нь юу юм вэ?

-Техник технологи хөгжөөд гар хийцийн юм шахагдана гэж хүмүүс ойлгодог. Гэхдээ үгүй байхгүй юу. Техник технологи хөгжих тусам гар хийцийн юм улам үнэ цэнтэй болно. Машинаар хийсэн сийлбэрт хурц шийдэл байдаггүй. Нэг бүрчлэн гараар зурж, гараар хийсэн сийлбэр амьд харагддаг. Машины  сийлбэр бүлцгэр, хурц ирмэггүй байдаг. Нэг ижил төстэй зургаар хийсэн ч гараар хийж байгаа гэр, тавилга ерөөсөө дахин давтагдашгүй болдог. Үнэ цэнэ нь тэрэндээ байгаа.

-Үндэсний үйлдвэрлэл тэр дундаа Монголын онцлогийг харуулсан тавилга үйлдвэрлэхэд ямар дэмжлэг хэрэгтэй байна вэ. Бэрхшээлтэй асуудлууд юу байна?

-Манайхан чинь үндэсний үйлдвэрлэгч гэхээр яагаад ийм аймаар үнэтэй байдаг юм бэ. Аймаар шуналтай юмаа гэж ярьдаг. Ерөнхийдөө гаднаас Эрээнээс ч юм уу орж ирдэг тавилгууд үйлдвэрийн аргаар хэдэн мянгаар нь үйлдвэрлэсэн учир хямдхан орж ирдэг. Үртэс шиг юмыг цавуудаад хивэнд  шахаад олон тоогоор үйлдвэрлэж байгаа шүү дээ. Харин модон тавилга бол өөр. Авдар хийлээ гэхэд модын нааж хавтгай болгон мужааны бэлдэц хийнэ. Бэлдэц дээрээ зургаа тавьж гараар сийлнэ. Өнгөлж зүлгэсний дараа дахиад Монгол зургийн ажил хийнэ. Тэгээд лак будагны ажил хийгдэнэ. Нэг авдар хийхэд 6 хүний гар дамждаг. Дор хаяж 10 авдрыг зэрэг хийж байж хүмүүсийнхээ цалинг тавьж, тодорхой хэмжээний ашигтай явна.  Хийцээсээ, хэмжээнээсээ шалтгаалаад үнэ нь өөрчлөгдөж байдаг. Би эндээс 10 см хасуулмаар байна. 20 см нэммээр байна. Хийцийн гоё болгомоор байна. Эсвэл мөнгөндөө тааруулаад хөнгөн сийлбэртэй хямдхан болгомоор байна гээд олон шалтгааны улмаас үнэ өөрчлөгддөг. Гар сийлбэртэй гэр, тавилга олон хүний хөдөлмөрөөр бүтдэг учир харьцангуй үнэтэй байдаг.

-“Урчуудын хясаа” компани хэдэн хүнийг ажлын байраар хангаж байна вэ?

-Одоогоор албан болон албан бус 10 гаруй хүнтэй байна. Зундаа бол 15-16  хүн ажиллана. Хүмүүсийг ажилд авахдаа ерөөсөө чадварын хардаг. Гэхдээ сэтгэлтэй, дөртэй хүнийг сургаад авдаг. Дор хаяж нүдний уртай, зураг зурчихдаг хүнийг сийлбэрт сургаж болдог. Гэхдээ манайхан чинь жоохон юм сурчхаараа  дийлэнх нь гараад явчихдаг юм.

-“Урчуудын хясаа”-ийн хийсэн гэр, тавилгын бусдаас ялгарах давуу тал юу вэ?

- Хэрэглээ тал дээрээ ч, харагдах байдал дээрээ ч үнэ цэнэтэй. Миний хувьд чанартаа илүү анхаардаг. Хамгийн гол нь мод сонголт юм. Дандаа хатаалганы үйлдвэрээс гайгүй мод авахыг боддог. Сэтгэл зүрхээ гаргаж хийчхээд өнөөх нь жоохон нойтон мод таараад цуураад уначихвал хайран.

-Үйлдвэрлэлээ явуулахад бараа, материалын үнийн өсөлт хүндрэлтэй байдал үүсгэж байгаа гэсэн?

-Хөл хорио чинь ноднин хэдэн сараас тогтож эхэллээ. Яг жил болж байна тэ. Тэр үед чинь 12 ширхэгтэй нэг куб банз 450-500 мянгад олддог байсан. Одоо тэгсэн 1 сая 350 мянга болчихсон. Бараг 3 дахин өсчихсөн юм биш үү. Тэр банзыг манайхан чинь хилээр оруулж ирдэггүй. Хилээр орж ирж байгаа бараануудтай барьцдаг юм уу. Далимдуулдаг гэх юм уу. Зөвхөн энүүхэн Сэлэнгээс ачаад ирж байгаа модоо хилээр оруулж ирж байгаа бараануудтай барьцаж 3 дахин нэмж байна. Ийм муухай байж болохгүй л дээ.

-Компаниа яагаад “Урчуудын хясаа” гэж нэрлэсэн юм бэ?

-Манай өвөг эцгүүд өндөр хадан цохиог тойроод нутагладаг байсан юм. Урчууд нутагладаг  байсан учир нутгийнхан өнөөх өндөр хясааг дархчуудын хясаа гэх болж. Би компаниа Дархчуудын хясаа гэж нэрлэх гэсэн чинь Дархан гэдэг нэр давхацсан байхгүй юу. Тэгэхээр нь урчууд болгоод “Урчуудын хясаа” болгож авсан.

-Таны болон компанийн цаашдын зорилго юу вэ?

-2012 оноос хойш өдийг хүртэл зөндөө алдаа оноог туулсан. Заримдаа огт захиалгагүй үе ч байсан. Шантрахгүйгээр ерөөсөө тууштай яваад ирсэн болохоор үр дүн нь одоо гарч ирж байна л даа. Манайх захиалга ихтэй байсан ч гэсэн хамаагүй хэдэн сарын дараа авъя гээд захиалгаа түрүүлж өгчхөөд хүлээж байдаг хүмүүс бас зөндөө байна. Цаашдын зорилго аль болох олон Монгол залуучуудыг ажлын байртай болгох хоёрдугаарт ижил юм хийж байгаа хүмүүсийнхээ түрүүнд алхах.

Ярилцсанд баярлалаа.

Г.Лхагважав